Vous avez faim ?

Isa ka a fɔ alu ɲɛ ko: «Nne le ye ɲanamaya buru wo di. Ni mɛn nada n ma, wo tɛ kɔnkɔ mutun. Ni mɛn dɛnkɛnɛyada n ma, minlɔɔ tɛ wo mina mutun fewu! Álu bada n ye, kɔnin álu dɛnkɛnɛyanɛn tɛ n ma. N ka wo le fɔ álu ɲɛ kɔrɔman. N Fa ba mɔɔ mɛnnu di n ma, wolu bɛɛ di na n ma. Ni mɔɔ-mɔɔ nada n ma, n tɛ wo gbɛn habadan. Baa, n jiida ka bɔ sankolo dɔ n kelayabaa sawo le kɛ kan ma, kɔnin n yɛrɛ sawo ko tɛ. Nba, n kelayabaa sawo le ko: a ba fen mɛnnu di n ma, ko kelenpe kana tunun wolu dɔ, baa n di wolu lawuli lon naban dɔ. Baa, n Fa sawo le ko mɔɔ-mɔɔ ba Dencɛ ye ka dɛnkɛnɛya a ma, wo di ɲanamaya banbali sɔrɔn. N yɛrɛ di wo lawuli laban lon.»

Wo dɔ, Yahudiyalu wulida dakɔdɔ kuma fɔla a ma ka a masɔrɔn a kan ko: «Nne le ye buru di, mɛn jiinɛn ka bɔ sankolo dɔ.» Alu tɛrɛ a fɔla ko: «Yusufu dencɛ Isa le tɛ nin di ba? An ka a na ani a fa lɔn. Munna a ye a fɔla ko: ‹N jiinɛn ka bɔ sankolo le dɔ›»?

Isa ka alu jabi ko: «Álu ye dakɔdɔ kuma boloka álu ni ɲɔɔn tɛ. Mɔɔ si tɛ se nala n ma, fo ni n Fa mɛn ka n kelaya, ni wo ka i masaman, an di wo lawuli lon naban dɔ. Kelalu la sɛbɛli ye a fɔla ko: ‹Alla di alu bɛɛ karan.› Mɔɔ mɛnnu ba alu tolomalɔ n Fa la, ka sɔn a la karan ma, wolu bɛɛ di na n ma. N ma a fɔ ko: mɔɔ do bada n Fa ye. Wo tɛ. Mɔɔ si ma n Fa ye, fo mɛn fadanɛn Alla la, wo le ka a ye.

«N ye tuɲa fɔla álu ɲɛ ko: mɔɔ mɛn dɛnkɛnɛyanɛn, ɲanamaya banbali ye wo bolo. Nne le ye ɲanamaya buru di. Álu benbalu ka maan damun wula kɔnɔ kɔnin alu sada. Kɔnin, buru nin bɔnɛn sankolo le dɔ, kosa mɛn ba a damun wo kana sa. Nne le ye ɲanamaya buru di, mɛn jiida ka bɔ sankolo dɔ. Ni mɔɔ mɛn ka buru wo damun, wo di to ɲanamaya dɔ kadawu! N di buru mɛn di duɲa la ɲanamaya kosɔn, wo ye n fadisobo le di.»»

Yohana 6:35-51

Isa kan ko a kelenpe le dise anna kɔnkɔ ko ɲanabɔla a ɲa jɛdɛ jɛdɛ ma